Dil Ayubi
dil par rakho nigah jigar par nazar karo
maqdur ho to zaat men apni safar karo
hangam-e-ḳhair-maqdam-e-sub.h-e-nashat hai
parvana-var shaam se raqs-e-sharar karo
zanjir toḌna bhi baḌa kaam tha magar
fursat men ho to zinat-e-divar-o-dar karo
mayus-kun hai alam-e-imkan abhi to kya
duniya-e-mumkinat pe apni nazar karo
jo gham bhi de hayat ḳhushi se qubul ho
itna to ehtimam gham-e-mo’tabar karo
apnon ko to nibahane vaale hazar hain
insan ho to dil men adu ke bhi ghar karo
jaata nahin ye tiir kisi haal men ḳhata
har marhala hayat ka ulfat se sar karo
sab luT rahe hain bar-sar-e-bazar in dinon
kis se kahen ki qadr-e-mata-e-hunar karo
ik rahguzar manzil-e-masti hai mai-kada
har rind ko ḳhushi se sharik-e-safar karo
ai ‘dil’ bahut ḳharab hain halat shahr ke
yaan jis kisi se baat karo muḳhtasar karo
Leave a Reply