abdul-aziz-khalid

Phuli Hai Shafaq Go Ki Abhi Sham Nahin Hai

phuli hai shafaq go ki abhi shaam nahin hai

hai dil men vo gham jis ka koi naam nahin hai

kis ko nahin kotahi-e-qismat ki shikayat

kis ko gila-e-gardish-e-ayyam nahin hai

aflak ke saae tale aisa bhi hai koi

jo said-e-zabun maya-e-alam nahin hai

chhilkon ke hain ambar magar maghz nadarat

duniya men musalman to hain islam nahin hai

iman nahin momin ka mukafat-e-amal par

ummid-e-karam kya tama-e-kham nahin hai

masjid ho kharabat ho ya ku-e-butan ho

is qalb-e-tapan ko kahin aram nahin hai

ai mah-visho lala-rukho vasl ki ham ko

khvahish to hai be-shak magar ibram nahin hai

kaifi hain mai-e-nab-e-khum-e-mehr-shuda ke

ham ko talab-e-durd-e-tah-e-jam nahin hai

lafzon ke dar-o-bast pe har-chand ho qadir

shaer nahin jo sahab-e-ilham nahin hai

har baat hai ‘khalid’ men pasandida o matbu

ik pairvi-e-rasm-o-rah-e-am nahin hai

More Poems

Leave a Comment