havas ki duniya men rahne valon ko main mohabbat sikha raha huun
jahan pe daman bichhe hue hain vahan par ankhen bichha raha huun
surud-e-gham par bhi zindagi men tarab ke dhare baha raha huun
main un ke saz-e-jafa par apni vafa ke naghme suna raha huun
ilahi duniya men aur kuchh din abhi qayamat na aane paa.e
tire bana.e hue bashar ko abhi main insan bana raha huun
adam ke tarik raste men koi musafir na raah bhule
main sham-e-hasti bujha kar apni charagh-e-turbat jala raha huun
main apni tarz-e-jun.un ke sadqe mira junun bhi ajab junun hai
kisi ka daman pakaḌ raha huun kisi se daman chhuḌa raha huun
abhi to aaya hi tha vahan se kabhi na jaane ka ahd kar ke
magar mohabbat zahe mohabbat abhi vahin se phir aa raha huun
mili hai kanTon ki mujh ko qismat magar hai phulon ki meri fitrat
jahan huun pamal-e-gham huun lekin jahan bhi huun muskura raha huun
chala hai shauq-e-sujud le kar ilahi ye kis ke dar ki janib
abhi to pahla qadam uTha hai abhi se main sar jhuka raha huun
tiri nazar kya main apne dil se bhi gir ke jaata huun anjuman se
jahan ki hoti hai ḳhatm duuri vahan se bhi duur ja raha huun
ye kis ke kuche men gamzan huun ye astan kis ka samne hai
main apne qadmon par aaj ‘bismil’ sar-e-do-alam jhuka raha huun
Leave a Reply