Shifa Kajgavnwi
vo jo mujh se ḳhafa nahin hota
dard had se siva nahin hota
meri koshish ko jo raza milti
lafz yuun be-sada nahin hota
ham-zaban to bahut mile lekin
kyuun koi ham-nava nahin hota
ham agar pahle jaag jaate to
saneha vo hua nahin hota
aag basti ki gar bujhata tu
us ka ghar bhi jala nahin hota
koi koshish kabhi to ki hoti
tum se kuchh bhi chhupa nahin hota
fikr hoti nahin jo roTi ki
koi apna juda nahin hota
Leave a Reply