Hawa Ke Pas Bas Ek Taziyana Hota Hai

havā ke paas bas ik tāziyāna hotā hai

isī se shahr o shajar ko Darānā hotā hai

vo saarī bāteñ maiñ ahbāb hī se kahtā huuñ

mujhe harīf ko jo kuchh sunānā hotā hai

munāfiqoñ meñ shab-o-roz bhī guzārtā huuñ

aur un kī zad se bhī ḳhud ko bachānā hotā hai

kitāb-e-umr bharī jā rahī hai lekin kyuuñ

na koī lafz na chehra purānā hotā hai

vahāñ bhī mujh ko ḳhudā sar-buland rakhtā hai

jahāñ saroñ ko jhukā.e zamāna hotā hai

Leave a Comment