Charagh-E-Shauq Lahu Se Jala Diya Humne

Syed Nawab Haider Naqvi Rahi

charagh-e-shauq lahu se jala diya ham ne

ik aur qissa-e-vahshat suna diya ham ne

jo mauj sar ko paTakti rahi hai sahil se

usi ko ru-kash-e-tufan bana diya ham ne

na.e jo ham-safar-e-kesh-e-ishq hain un ko

ma.al-e-soz-e-mohabbat bana diya ham ne

basan-e-ḳhana-ba-doshan ka.i hai umr apni

jahan qayam kiya ghar bana diya ham ne

bujhi bujhi si rahe sham-e-arzu sar-e-bazm

so raushni ke liye dil jala diya ham ne

zamin-e-shor lagi dasht-e-arzu men jahan

vahin pe ishq ka pauda laga diya ham ne

chale hain rah-guzar-e-shauq par hava ki tarah

jo aaya samne ‘rahi’ haTa diya ham ne