kya puchhte ho mujh se ki main kis nagar ka tha
jalta hua charagh miri rah-guzar ka tha
ham jab safar pe nikle the taron ki chhanv thi
phir apne ham-rikab ujala sahar ka tha
sahil ki giili ret ne baḳhsha tha pairahan
jaise samundaron ka safar chashm-e-tar ka tha
chehre pe uḌti gard thi balon men raakh thi
shayad vo ham-safar mire ujḌe nagar ka tha
kya chiḳhti havaon se ahval puchhta
saaya hi yadgar mire ham-safar ka tha
yaksaniyat thi kitni hamare vajud men
apna jo haal tha vahi aalam bhanvar ka tha
vo kaun tha jo le ke mujhe ghar se chal paḌa
surat ḳhizar ki thi na vo chehra ḳhizar ka tha
dahliz paar kar na sake aur lauT aae
shayad musafiron ko ḳhatar bam-o-dar ka tha
kachche makan jitne the barish men bah gae
varna jo mera dukh tha vo dukh umr bhar ka tha
main us gali se kaise guzarta jhuka ke sar
aḳhir ko ye muamla bhi sang-o-sar ka tha
logon ne ḳhud hi kaaT diye raston ke peḌ
‘aḳhtar’ badalti rut men ye hasil nazar ka tha
Leave a Reply