guzre the husain ibn-e-ali raat idhar se
ham men se magar koi bhi nikla nahin ghar se
is baat pe kis vaste hairan hain ankhen
patjhad hi men hote hain juda patte shajar se
tu yuun hi pasheman hai sabab tu nahin is ka
niind aati nahin ham ko kisi khvab ke Dar se
sunte hain bahut naam kabhi dekhte ham bhi
ai mauj-e-bala tujh ko guzarte hue sar se
thakna hai thaharna hai bahar-hal sabhi ko
ji apna bhi bhar jaega ik roz safar se