ham tujh se koi baat bhi karne ke nahin the
imkan bhi halat sanvarne ke nahin the
bhar Daala unhen bhi miri bedar nazar ne
jo zaḳhm kisi taur bhi bharne ke nahin the
ai ziist idhar dekh ki ham ne tiri ḳhatir
vo din bhi guzare jo guzarne ke nahin the
kal raat tiri yaad ne tufan vo uThaya
aansu the ki palkon pe Thaharne ke nahin the
un ko bhi utara hai baḌe shauq se ham ne
jo naqsh abhi dil men utarne ke nahin the
ai gardish-e-ayyam hamen ranj bahut hai
kuchh ḳhvab the aaise ki bikharne ke nahin the
Leave a Reply