thoDi Si Waza oDh Li Aur Waza-Dar Ho Gae

Ehtisham Ul Haq Siddiqui

thoḌi si vaz.a oḌh li aur vaz.a-dar ho ga.e

ashab-e-izz-o-jah men ham bhi shumar ho ga.e

ham bhi chaTTan the magar zarb-e-shadid vaqt se

har lamha TuTte rahe aḳhir ghubar ho ga.e

tarkash men jis ke tiir the na haath men kaman thi

shumi-e-baḳht dekhte us ka shikar ho ga.e

manDi men le to aa.e ho lekin vo bik na pa.enge

mausam-e ki maar se jo phuul daghdar ho ga.e

sharm-o-haya adab ke jo the kuchh libas-e-faḳhira

ghar men rakhe rakhe hi vo taar taar ho ga.e

sab ke huquq kuchh na kuchh hain qarz meri zaat par

kaise chuka.unga vahan itne udhar ho ga.e