Jab Tabiat Sukun Se Ghabrai

Poet

jab tabi.at sukun se ghabra.i

le chala zauq-e-abla-pa.i

vo hue ma.il-e-masiha.i

maut phir zindagi se sharma.i

zulf bikhri ki bas ghaTa chha.i

ahl-e-taqva pe ik bala aa.i

ta.ir-e-arzu ne par tole

sehn-e-dil men chali hai purva.i

muḌ ke tufan ko barha dekha

nazd-e-sahil jo mauj le aa.i

kashmakash vo junun-o-hosh men hai

ban gaya husn bhi tamasha.i

ruh-o-tan men azal se nisbat hai

phir bhi hain tishna-e-shanasa.i

shaiḳh ko ḳhuld-o-hur ka sauda

haa.e ye lazzaton ki gira.i

mai-kada ka ye mo.ajiza hai ajiib

kufr-o-din men bhi hai shanasa.i

shaghl-e-mai fart-e-gham men kya karte

is men thi duḳht-e-raz ki rusva.i

din ko masjid to shab ko mai-ḳhana

tujh sa ‘farhat’ hai kaun harja.i