Ret Ki Tarah Kinaron Pe Hain Darne Wale

ret kī tarah kināroñ pe haiñ Darne vaale

mauj-dar-mauj ga.e paar utarne vaale

aaj kāñToñ se garebān chhuḌā.eñ to sahī

lāla-o-gul pe kabhī paañv na dharne vaale

ruup se chhab se phaban se koī āgāh nahīñ

naqsh-kār-e-lab-o-āriz haiñ sañvarne vaale

koī jiine kā salīqa ho to maiñ bhī jānūñ

maut āsān hai mar jaate haiñ marne vaale

mere jiine kā ye uslūb pata detā hai

ki abhī ishq meñ kuchh kaam haiñ karne vaale

Leave a Comment