safar mujh par ajab barpa rahi hai
miri vahshat mujhe chaunka rahi hai
kahin se aa rahi hai teri ḳhushbu
udasi duur hoti ja rahi hai
abhi tak ḳhud nahin samjhi hai jis ko
mujhe vo baat bhi samjha rahi hai
amiron ke bache TukḌon ko chun kar
gharibi bhuuk ko bahla rahi hai
mubarak shaam ki aamad mubarak
kisi ki yaad le kar aa rahi hai
ga.i shab aankh men jo mar gaya tha
udasi ḳhvab vo sahla rahi hai
bahut maghrur hai ye badshahi
hamare ishq ko chunva rahi hai
daraḳhton par na.e zevar uge hain
zamin dulhan bani sharma rahi hai
hamare darmiyan alfaz gum hain
”ḳhamoshi ungliyan chaTḳha rahi”
bahut ummid thi is zindagi se
magar ummid ye murjha rahi hai
‘ziya’ jalva hai ‘nasir-kazmi’ ka
ghazal ye ḳhud mujhe taḌpa rahi hai
Leave a Reply