dekhen kya ab ke asiri hamen dikhlati hai
log kahte hain ki phir fasl-e-bahar aati hai
ghash chala aata hai aur aankh mundi jaati hai
ham ko kya kya miri be-taqati dikhlati hai
kya suna us ne kahin rukhsat-e-gul ka mazkur
andalib aaj qafas men padi chillati hai
taer-e-ruh ko parvaz ka har dam hai khayal
qafas-e-tan men miri jaan ye ghabrati hai
dekh rote mujhe hans hans kahe jaana har dam
jaan se mujh ko to teri ye ada bhati hai
bazm-e-hasti men tu baitha hai ‘havas’ kya ghafil
kuchh jo karna hai tu kar umr chali jaati hai
Leave a Reply