khaak kar dalen abhi chahen to mai-khane ko ham
ek saghar ko bharo tum ek paimane ko ham
mujh se ham-aghosh ho kar yuun kaha aur sach kaha
hoshiyar is tarah kar dete hain divane ko ham
nazaa men aae hain sad afsos jite-ji na aae
vo hain aane ko to ab tayyar hain jaane ko ham
be-natija un pe marna yaad aata hai hamen
shama par jab dekhte hain marte parvane ko ham
kohkan aur qais ki qabron se aati hai sada
kya mukammal kar gae ulfat ke afsane ko ham
ek patta bhi nahin hilta ba-juz hukm-e-khuda
kis tarah abad kar len apne virane ko ham
ek din ye hai ki hain ik shama-ru par khud nisar
ek din vo tha bura kahte the parvane ko ham
abruon ne sach kaha us ke ishare ki hai der
dekhte bilkul nahin phir apne begane ko ham
jaan jaae ya rahe us ko sunaenge zarur
qais ke parda men ‘parvin’ apne afsane ko ham
Leave a Reply