Shaz Tamkanat
jis taraf ja.un udhar alam-e-tanha.i hai
jitna chaha tha tujhe utni saza paa.i hai
men jise dekhna chahun vo nazar na aa sake
haa.e in ankhon pe kyuun tohmat-e-bina.i hai
barha sar-kashi o kaj-kulahi ke ba-vasf
tere dar par mujhe daryuza-gari laa.i hai
sadma-e-hijr men tu bhi hai barabar ka sharik
ye alag baat tujhe tab-e-shakeba.i hai
bhulne vaale ne shayad ye na socha hoga
ek do din nahin barson ki shanasa.i hai
jam-e-ḳhush-rang tahi hai mujhe ma.alum na tha
apni TuuTi hui tauba pe hansi aa.i hai
ye tavajjoh bhi tiri husn-e-gurezan ki tarah
ye taghaful bhi miri hausla-afza.i hai
tera lahja hai ki sannaTe ne ankhen kholin
teri avaz kalid-e-dar-e-tanha.i hai
‘shaz’ puchho ki ye ankhon ka dhundlaka kab tak
raat aa.i nahin ya niind nahin aa.i hai
Leave a Reply