Tabish Dehlvi
dhumen macha.en sabza raunden phulon ko pamal karen
josh-e-junun ka ye aalam hai ab kya apna haal karen
dasht-e-jan men ek ḳhushi ki lahr kahan tak dauḌegi
vasl ke ik ik lamhe ko ham kyuun kar maah o saal karen
jaan se baḌh kar dil hai pyara dil se ziyada jaan aziiz
dard-e-mohabbat ka ik tohfa kis kis ko irsal karen
nang-e-karam hai soz-e-alam se ahl-e-dil ki mahrumi
dard-e-ishq mata-e-jan hai sahib kuchh to ḳhayal karen
mausam badle phir bhi hai ashob-e-visal-o-hijr vahi
haal zamane ka jab ye ho kya maazi kya haal karen
ruuh ki ek ik choT ubharen dil ka ek ik zaḳhm dikha.en
ham se ho to numayan kya kya apne ḳhadd-o-ḳhal karen
qarz bhala kya dega koi bhiik bhi milni mushkil hai
nadaron ki is basti men kis se ja ke saval karen
har ik dard ko apna janen har ik gham ko apna.en
ḳhvah kisi ki daulat-e-gham ho dil ko malamal karen
be-hunari ko hunar kare ye ahl-e-hunar ka dushman hai
charḳh-e-kaj-raftar hai aḳhir ‘tabish’ ham bhi ḳhayal karen
Leave a Reply