us sitamgar ki mehrbani se
dil ulajhta hai zindagani se
ḳhaak se kitni suraten ubhrin
dhul ga.e naqsh kitne paani se
ham se puchho to zulm behtar hai
in hasinon ki mehrbani se
aur bhi kya qayamat aa.egi
puchhna hai tiri javani se
dil sulagta hai ashk bahte hain
aag bujhti nahin hai paani se
hasrat-e-umr-e-javedan le kar
ja rahe hain sara-e-fani se
haa.e kya daur-e-zindagi guzra
vaqiye ho ga.e kahani se
kitni ḳhush-fahmiyon ke but toḌe
tu ne gulzar ḳhush-bayani se
Leave a Reply