Rashid Taraz
apne bimar sitare ka mudava hoti
dard ki raat agar anjuman-ara hoti
kuchh to ho jaati tasalli dil-e-pazhmurda ko
ghar ki virani jo saman-e-tamasha hoti
zindagi apni is ashufta-mizaji se bani
ye na hoti to miri zaat bhi sahra hoti
saari raunaq tire hone ke yaqin men hai nihan
tu na hota to bhala kaahe ko duniya hoti
hain bahut husn men yaan nadir-o-kamyab to log
koi surat nahin aisi ki jo yakta hoti
raushni ke liye phirte rahe dar dar ham log
koi dahliz to mehrab ka dhoka hoti
teri ta.azim se aghaz jo karta ‘rashid’
us ki duniya tire irfan ka gosha hoti
Leave a Reply