Nusrat Mehdi
katra ke zindagi se guzar ja.un kya karun
rusva.iyon ke ḳhauf se mar ja.un kya karun
main kya karun ki teri ana ko sukun mile
gir ja.un TuuT ja.un bikhar ja.un kya karun
phir aa ke lag rahe hain paron par hava ke tiir
parvaz apni rok luun Dar ja.un kya karun
jangal men be-aman si baiThi hui huun main
avaz kis ko duun main kidhar ja.un kya karun
kya hukm aap ka hai mire vaste huzur
jaari safar rakhun ki Thahar ja.un kya karun
kab tak sunun bahar men ḳhushbu ki dastaken
kyon ai gham-e-hayat sanvar ja.un kya karun
Leave a Reply