Nau Bahar Sabir
har ek shaḳhs ḳhafa mujh se anjuman men tha
ki mere lab pe vahi tha jo mere man men tha
kasak uThi thi kuchh aisi ki chiḳh chiḳh paḌun
raha main chup hi ki bahron ki anjuman men tha
ulajh ke rah ga.i jaame ki dilkashi men nazar
use kisi ne na dekha jo pairahan men tha
kabhi main dasht men avara ik bagula sa
kabhi main nik.hat-e-gul ki tarah chaman men tha
main us ko qatl na karta to ḳhud-kushi karta
vo ik harif ki surat mire badan men tha
usi ko mere shab-o-roz par muhit na kar
vo ek lamha-e-kamzor jo gahan men tha
miri sada bhi na mujh ko suna.i di ‘sabir’
kuchh aisa shor bapa sahn-e-anjuman men tha
Leave a Reply