Jo Gham Ke Shoalon Se Bujh Gae the Hum Un Ke Daghon Ka Haar Lae

jo gham ke sho.alon se bujh ga.e the ham un ke daghon ka haar laa.e

kisi ke ghar se diya uThaya kisi ke daman ka taar laa.e

ye kohsaron ki tarbiyat hai ki apna ḳhema jama hua hai

hazar tufan sinan chala.e hazar fauj-e-ghubar laa.e

kise bata.en ki gham ke sahra ko ḳhuld-danish banaya kaise

kahan se ab-e-ravan ko moḌa kahan se bad-e-bahar laa.e

har ek rah-e-junun se guzre har ek manzil se kuchh uThaya

kahin se daman men gham sameTa kahin se jholi men pyaar laa.e

ḳhala ke mathe pe ek bindi na jaane kab se chamak rahi thi

use bhi farq-e-zamin ki ḳhatir hava men uḌ kar utaar laa.e

jo apni duniya basa chuka hai use bhi mushkil ka samna hai

kahan se shams-o-qamar ugaa.e kahan se lail-o-nahar laa.e

vahi shabahat vahi ada.en magar vo lagta hai ghair jaisa

‘na.im’ yadon ki anjuman men na jaane kis ko pukar laa.e