hai mira tar-e-nafas tar-e-qafas
rishte barpa hon giraftar-e-qafas
murgh-e-dil ko zabh ai sayyad kar
aur taair hain sazavar-e-qafas
shauq bulbul ko asiri ka jo ho
ho zar-e-gul se kharidar-e-qafas
kyuun na main rangin-bayan huun qaid-e-ranj
murgh-e-khush-khvan hai sazavar-e-qafas
zindagi se qaid men bhi huun subuk
gaah bar-e-dam gah bar-e-qafas
mujh sa bulbul qaid ho kar chhut jaae
so gae kya bakht-e-bedar-e-qafas
chashm-e-alam men asir-e-dam hai
ruuh hai tan men sazavar-e-qafas
phand kar aaya tha divar-e-chaman
phand jaun kyuun ki divar-e-qafas
kya hai dagh-e-khun-e-bulbul ki bahar
dekh ai sayyad gulzar-e-qafas
kab kisi bulbul ko milta hai gulab
khun-e-dil piita hai bimar-e-qafas
zabh karne ko utara nakhl se
sar mira tha pa-e-raftar-e-qafas
puchhta hai kya dil-e-bulbul ka haal
dekh zalim jism-afgar-e-qafas
ashk ko hai dam-e-gesu ki talash
tifl hota hai kharidar-e-qafas
ta-ba-kai hoga asir-e-dam-e-fikr
‘arsh’ kar mauquf ashar-e-qafas
Leave a Reply