Jaleel Aali
sabil-e-sajda-e-na-muḳhtatam banate hue
ḳhuda tak aa.e hain kya kya sanam banate hue
ghurur-e-ishq men ik inkisar-e-faqr bhi hai
ḳhamida-sar hain vafa ko alam banate hue
tire ḳhayal ki rau hai ki koi mauj-e-tarab
guzar rahi hai ajab zer-o-bam banate hue
jabin-e-vaqt pe sabt apna naqsh us ne kiya
dilon ke daagh charagh-e-haram banate hue
to kya zarur ki tahqir ḳhalq karte phiro
ik apna aks-e-ana muhtashim banate hue
guzarte hain kahan zindagi guzarti hai
bas ek raah ba-su-e-adam banate hue
Leave a Reply