Ibrahim Ashk
labon par pyaas ho to aas ke badal bhare rakhiyo
sarabon ke safar men is tarah gulshan hare rakhiyo
ye bazar-e-jahan hai be-gharaz koi nahin milta
parakh kar jab talak dekho nahin sab ko pare rakhiyo
vafa ke bol par be-mol bik jaati hai ye duniya
agar ho be-sar-o-saman to ye sikke khare rakhiyo
kisi ke samne daman pasare se milega kya
agar insan ho ḳhuddariyon se ghar bhare rakhiyo
sharabon se bhare pyale mujhe takne ki aadat hai
badan bhiga rasile honT naina mad-bhare rakhiyo
na jaane kab kisi ke ḳhvab se ye dil dhaḌak jaa.e
agar sone lago to haath siine par dhare rakhiyo
Leave a Reply