Nawaz Asimi
tire maslak men kya itna bhi samjhaya nahin jaata
faqiron aur durveshon se Takraya nahin jaata
na.e jumle talasho vaqa.i gar tum muqarrar ho
har ik taqrir men jumlon ko dohraya nahin jaata
tiri furqat men saare jism ko pathra diya main ne
faqat ankhen bachi hain in ko pathraya nahin jaata
tu apne ohda-e-munsif se munsif istifa de de
agar haqdar ka haq tujh se dilvaya nahin jaata
anal-haq kahne vaale aaj bhi maujud hain lekin
unhen is daur men phansi pe laTkaya nahin jaata
hava ho tez to divar-o-dar tharrane lagte hain
magar is ḳhauf se ghar chhoḌ ke jaaya nahin jaata
bahut se peḌ adam-ḳhor-ḳhaslat vaale hote hain
‘navaz’ har peḌ ke saaye men sustaya nahin jaata
Leave a Reply