Aziz Qaisi
miTa ke anjuman-e-arzu sada di hai
chale bhi aao ki har raushni bujha di hai
gar ittifaq se paaya hai qatra-e-shabnam
samundaron ko miri pyaas ne dua di hai
hujum-e-rah-e-ravan raund kar guzarta hai
bisat dil ki kahan ham ne ye bichha di hai
dilon ka ḳhuun karo salim rakho gareban ko
junun ki rasm zamana hua uTha di hai
na muḌ ke dekhegi duniya maro na ghuT ghuT ke
ye hadson pe hi bas chaunkne ki aadi hai
kisi ki jaan ka zamin nahin yahan koi
amin-e-shahr ki janib se ye munadi hai
kaho jo kahna hai kya pas-e-dard ‘qaisi’ ka
ki us ne dil se vo buniyad hi miTa di hai
Leave a Reply