charagh samne vaale makan men bhi na tha
ye saneha mire vahm-o-guman men bhi na tha
jo pahle roz se do anganon men tha haa.il
vo fasla to zamin asman men bhi na tha
ye gham nahin hai ki ham donon ek ho na sake
ye ranj hai ki koi darmiyan men bhi na tha
hava na jaane kahan le ga.i vo tiir ki jo
nishane par bhi na tha aur kaman men bhi na tha
‘jamal’ pahli shanasa.i ka vo ik lamha
use bhi yaad na tha mere dhyan men bhi na tha
Leave a Reply