manzil-e-ishq ke rahbar kho ga.e
mere hamdam mire ham-safar kho ga.e
inqilab-e-zamana ne karvaT jo li
zikr ik do ka kya ghar ke ghar kho ga.e
ho ga.i ḳhatm rasm-e-mulaqat bhi
vo nazare vo sham-o-sahar kho ga.e
ham ne har gaam par saath chaha magar
qafile har na.e moḌ par kho ga.e
main jo daman men laaya tha aansu tire
daagh hain un ke la.al-o-gohar kho ga.e
baat ye raaz ki hai ki sab rah-rau
rafta rafta har ik moḌ par kho ga.e
jab mukammal hui shams ki dastan
maslahat hai ki ahl-e-nazar kho ga.e
Leave a Reply