TimTimata hua mandir ka diya ho jaise
teri ankhon men koi ḳhvab chhupa ho jaise
pher liin tum ne nigahen to ye mahsus hua
mujh se ruThi hui tasir-e-dua ho jaise
gunjti hai mire kanon men yuun avaz tiri
koh o sahra men azanon ki sada ho jaise
apni nazren na jhukana ki guman hota hai
samne sar pe khaḌi meri qaza ho jaise
un ke ruḳhsat ka vo lamha mujhe yuun lagta hai
vaqt naraz hua din bhi Dhala ho jaise
paas hote ho to mahsus yahi hota hai
umr bhar ki ye riyazat ka sila ho jaise
bhiiḌ aisi hai kise sajda karun ai ‘azam’
aaj ke daur men har shaḳhs ḳhuda ho jaise
Leave a Reply