na ehtijaj na avargi men dekh mujhe
jo ho sake to miri raushni men dekh mujhe
gul-e-havas bhi hai shaḳh-e-visal ka hissa
charagh-e-lala ki taaza kali men dekh mujhe
vazahaton se tu kuchh bhi samajh na pa.ega
kabhi ghubar kabhi tirgi men dekh mujhe
faza-e-yad men tabdiliyan nahin hotin
jadid shaḳhs purani gali men dekh mujhe
sitara taab zamane ki yadgar huun main
kisi malal na sharmindagi men dekh mujhe
main ek buund sar-e-nok-e-ḳhar-e-sahra huun
tulu-e-sub.h-e-dam-e-aḳhiri men dekh mujhe
mire bayan ke jah-o-jalal par mat ja
mire ḳhayal ki pas-mandagi men dekh mujhe
Leave a Reply