chehra-e-zindagi nikhar aaya
jab kabhi ham ne jaam chhalkaya
sham-e-hijran bhi ik qayamat thi
aap aa.e to mujh ko yaad aaya
rang phika paḌa vafaon ka
aaj kuchh is tarah vo sharmaya
yuun to be-chainiyan muqaddar thiin
teri qurbat ne aur taḌpaya
kya qayamat vo kam-nigahi thi
har haqiqat ko jis ne jhuThlaya
kya hui vo dilon ki masumi
husn ruTha na ishq pachhtaya
haa.e kis kis maqam par dil ko
us uchaTti nazar ne bhaTkaya
ḳhud-shanasi thi justuju teri
tujh ko DhunDa to aap ko paaya
‘naqsh’ ankhon men aa ga.e aansu
aaj aise men kaun yaad aaya
Leave a Reply