Nasir Kazmi
khamoshi ungliyan chatkha rahi hai
tiri avaz ab tak aa rahi hai
dil-e-vahshi liye jaata hai lekin
hava zanjir si pahna rahi hai
tire shahr-e-tarab ki raunaqon men
tabiat aur bhi ghabra rahi hai
karam ai sarsar-e-alam-e-dauran
dilon ki aag bujhti ja rahi hai
kade koson ke sannate hain lekin
tiri avaz ab tak aa rahi hai
tanab-e-khema-e-gul thaam ‘nasir’
koi andhi ufuq se aa rahi hai
Leave a Reply