Shaad Aarfi
vaqt kya shai hai pata aap hi chal ja.ega
haath phulon pe bhi rakhkhoge to jal ja.ega
jis ko mahfil se nikalo ge nikal ja.ega
magar adbar to adbar hai Tal ja.ega
kahin fitrat ke taqaze bhi badal sakte hain
ghaas par sher jo paloge to pal ja.ega
kah diya tha ki ye rahbar jo chuna hai tum ne
saaf tote ki tarah aankh badal ja.ega
vo badalte hue mahaul ka sancha hi sahi
koi sikka to nahin zehn ki Dhal ja.ega
sub.h-e-mayus-e-gulistan ki qasam phir kahiye
baghbanon ke dimaghon se ḳhalal ja.ega
mai-kade aa ke vo insan banen ya na banen
hazrat-e-shaiḳh ka iman sambhal ja.ega
sitam-o-zulm ki Tahni bhi nahin phal sakti
aap ne baagh lagaya hai to phal ja.ega
farz hain ham pe bayanat-e-basirat ai ‘shad’
jis ki qismat men sambhalna hai sambhal ja.ega
Leave a Reply