jo hoga sab thiik hi hoga hone do jo hona hai
munh dekhe ki baten hain sab kis ne kis ko rona hai
dil kis se dukh bante apna kis se apni baat kahe
dil hi hai ik jis ne yaaro dard mukammal dhona hai
ham bhi mitti tum bhi mitti putle hain sab mitti ke
avval mitti akhir mitti mitti hi men sona hai
mil kar baithen nafrat chhoden pyaar vafa ki baat karen
bagh-e-vafa men ham ne yaaro biij ulfat ka bauna hai
aisa kaam karen kyuun ‘azim’ jis ko kar ke pachhtaen
pahle daagh lagaen kyuun ham jab ashkon se dhona hai
Leave a Reply