Ahmad Rahi
koi maazi ke jharokon se sada deta hai
sard padte hue shoalon ko hava deta hai
dil-e-afsurda ka har gosha chhanak uthta hai
zehn jab yadon ki zanjir hila deta hai
hal-e-dil kitna hi insan chhupae yaaro
hal-e-dil us ka to chehra hi bata deta hai
kisi bichhde hue khoe hue hamdam ka khayal
kitne soe hue jazbon ko jaga deta hai
ek lamha bhi guzar sakta na ho jis ke baghair
koi us shakhs ko kis tarah bhula deta hai
vaqt ke saath guzar jaata hai har ik sadma
vaqt har zakhm ko har gham ko mita deta hai
Leave a Reply