Poet
rah-e-hayat men dil-e-viran duha.i de
dushman ko bhi ḳhuda na gham-e-ashna.i de
main sahib-e-qalam huun mujhe ai shu.ur-e-fan
aa.e na jo giraft men aisi kala.i de
duniya fareb-e-rishta-e-baham na de mujhe
jo bha.i-chargi ka ho paikar vo bhaa.i de
main apna haath apne lahu men Dubo na luun
jab tak vo mere haath men dast-e-hina.i de
ḳhanjar hai jis ke haath men patthar hai jis ka dil
kya us ke samne koi apni safa.i de
jis par mire lahu ne sajaya tha naqsh-e-dil
ai kaash phir mujhe vo hatheli dikha.i de
is taaza karbala men bhi yarab dua ye hai
isar ko nasheb vafa ko tara.i de
duuri qarin-e-maslahat-e-vaqt hai agar
qurbat ke naam par mujhe dagh-e-juda.i de
sehn-e-chaman men gosh-bar-avaz hai ‘saba’
shayad dil-e-shamim ki dhaḌkan suna.i de
Leave a Reply