main takiye par sitare bo raha huun
janam-din hai akela ro raha huun
kisi ne jhank kar dekha na dil men
ki main andar se kaisa ho raha huun
jo dil par daagh hain pichhli ruton ke
unhen ab ansuon se dho raha huun
sabhi parchhaiyan hain saath lekin
bhari mahfil men tanha ho raha huun
mujhe in nisbaton se kaun samjha
main rishte men kisi ka jo raha huun
main chaunk uthta huun aksar baithe baithe
ki jaise jagte men so raha huun
kise paane ki khvahish hai ki ‘sajid’
main rafta rafta khud ko kho raha huun
Leave a Reply