Wasi Shah
gungunate hue anchal ki hava de mujh ko
ungliyan pher ke balon men sula de mujh ko
jis tarah faltu gul-dan paḌe rahte hain
apne ghar ke kisi kone se laga de mujh ko
yaad kar ke mujhe taklif hi hoti hogi
ek qissa huun purana sa bhula de mujh ko
Dubte Dubte avaz tiri sun ja.un
aḳhiri baar to sahil se sada de mujh ko
main tire hijr men chup-chap na mar ja.un kahin
main huun sakte men kabhi aa ke rula de mujh ko
dekh main ho gaya badnam kitabon ki tarah
meri tash.hir na kar ab to jala de mujh ko
ruThna tera miri jaan liye jaata hai
aise naraz na ho hans ke dikha de mujh ko
aur kuchh bhi nahin manga mire malik tujh se
us ki galiyon men paḌi ḳhaak bana de mujh ko
log kahte hain ki ye ishq nigal jaata hai
main bhi is ishq men aaya huun dua de mujh ko
yahi auqat hai meri tire jivan men ki main
koi kamzor sa lamha huun bhula de mujh ko
Leave a Reply