justuju meri kahin thi aur main bhaTka kahin
mil ga.i manzil mujhe to kho gaya rasta kahin
puchhta rahta huun ḳhud se kya use dekha kahin
aa.ine ke zaviyon men kho gaya chehra kahin
mujh ko mat roko ki main itna thakan se chuur huun
phir Thahar hi ja.unga main ab agar Thahra kahin
muddaton ke ba.ad phir nam ho ga.iin ankhen miri
phir mire ehsas ke patthar men dil dhaḌka kahin
TuuT kar chaha tujhe lekin ye hasrat rah ga.i
tujh se dil ki baat kahte tu agar milta kahin
main kisi surat nikal aaya huun apni zaat se
Dar raha huun mil na jaa.e phir vahi duniya kahin
ek hi raftar se kashti ko mat khena yahan
vaqt ka dariya kahin uthla hai to gahra kahin
kyuun dilasa de rahe ho muntashir karne ke ba.ad
TuuT kar phir shaḳh se juḌta hai ik patta kahin
Leave a Reply