dil tha ki khush-khayal tujhe dekh kar hua
ye shahr be-misal tujhe dekh kar hua
apne khilaf shahr ke andhe hujum men
dil ko bahut malal tujhe dekh kar hua
tul-e-shab-e-firaq tiri khair ho ki dil
amada-e-visal tujhe dekh kar hua
ye ham hi jante hain judai ke mod par
is dil ka jo bhi haal tujhe dekh kar hua
aai na thi kabhi mire lafzon men raushni
aur mujh se ye kamal tujhe dekh kar hua
bichhde to jaise zehn muattal sa ho gaya
shahr-e-sukhan bahal tujhe dekh kar hua
phir log aa gae mira maazi kuredne
phir mujh se ik saval tujhe dekh kar hua
Leave a Reply