Fikr Mein Dube the Sab Aur Ba-Hunar Koi Na Tha

Zakir Khan Zakir

fikr men Duube the sab aur ba-hunar koi na tha

zindagi ki shaḳh par puḳhta samar koi na tha

ga rahe the apni apni dhun men sab ghazlen magar

‘mir’-o-‘ghalib’ ‘dagh’-o-‘hasrat’ ya ‘jigar’ koi na tha

rat-bhar zulmat men lipTi bastiyan kahti rahin

chand taare kahkashan jugnu qamar koi na tha

dekhne men yuun ba-zahir sab hamare saath the

jab saron par dhuup aa.i ham-safar koi na tha

ḳhuun ke rishton ki garmi sard thi charon taraf

sab tasalli de rahe the charagar koi na tha

rind-o-zahid shaiḳh-o-sufi sab ke sab tishna hi the

kis ko dete mai-kada jab mo’atabar koi na tha

phir ye socha likh hi bhejun hal-e-dil us ko magar

uḌ chuke the sab kabutar nama-bar koi na tha

zindagi-bhar bhigti palken thiin us ki muntazir

ham se baḌh kar ḳhud se ‘zakir’ be-ḳhabar koi na tha