Fikr Mein Dube the Sab Aur Ba-Hunar Koi Na Tha

fikr meñ Duube the sab aur bā-hunar koī na thā

zindagī kī shāḳh par puḳhta samar koī na thā

gā rahe the apnī apnī dhun meñ sab ġhazleñ magar

‘mīr’-o-‘ġhālib’ ‘dāġh’-o-‘hasrat’ yā ‘jigar’ koī na thā

rāt-bhar zulmat meñ lipTī bastiyāñ kahtī rahīñ

chāñd taare kahkashāñ jugnū qamar koī na thā

dekhne meñ yuuñ ba-zāhir sab hamāre saath the

jab saroñ par dhuup aa.ī ham-safar koī na thā

ḳhuun ke rishtoñ kī garmī sard thī chāroñ taraf

sab tasallī de rahe the chāragar koī na thā

rind-o-zāhid shaiḳh-o-sūfī sab ke sab tishna hī the

kis ko dete mai-kada jab mo’atabar koī na thā

phir ye sochā likh hī bhejūñ hāl-e-dil us ko magar

uḌ chuke the sab kabūtar nāma-bar koī na thā

zindagī-bhar bhīgtī palkeñ thiiñ us kī muntazir

ham se baḌh kar ḳhud se ‘zākir’ be-ḳhabar koī na thā

Leave a Comment