ye paimana sharab-e-tez se bharne nahin deti
koi shai zindagi men hai vahi marne nahin deti
ajab kuchh mutma.in rakhti hai ham ko bekali dil ki
hava-e-hijr ki yurish se bhi Darne nahin deti
hava-e-barshgal aḳhir ḳhush aati hai hamen lekin
jo ham ne kaam karna hai vahi karne nahin deti
bhaḌakti hai junun ki aag agar koh-o-bayaban men
koi tohmat hava-e-shahr pe dharne nahin deti
liye jaati hai naḳhl-e-arzu tak zindagi ‘ḳhalid’
magar daman ata-e-naḳhl se bharne nahin deti
Leave a Reply