garm-e-talash-o-justuju ab hai tiri nazar kahan
ḳhuun hai kuchh jama hua qalb kahan jigar kahan
hai ye tariq-e-ashiqi chahiye is men be-ḳhudi
is men chunan-chunin kahan is men agar magar kahan
zulf thi jo bikhar ga.i ruḳh tha ki jo nikhar gaya
haa.e vo shaam ab kahan haa.e vo ab sahar kahan
kijiye aaj kis tarah dauḌ ke sajda-e-niyaz
ye bhi to hosh ab nahin paanv kahan hai sar kahan
haa.e vo din guzar ga.e joshish-e-iztirab ke
niind qafas men aa ga.i ab gham-e-bal-o-par kahan
hosh o ḳhirad ke phere men umr-e-aziz sarf ki
raat to kaT ga.i yahan dekhiye ho sahar kahan
Leave a Reply