kuchh log taghayyur se abhi kaanp rahe hain
ham saath chale to hain magar haanp rahe hain
naron se siyasat ki haqiqat nahin chhupti
uryan hai badan laakh use dhanp rahe hain
kya baat hai shahron men simat aae hain saare
jangal men to ginti ke hi kuchh saanp rahe hain
makdi kahin makkhi ko giraftar na kar le
vo shokh-nigahon se mujhe bhanp rahe hain
ye jhuut hai ya sach hai samajh men nahin aata
sach bolne men hont mire kaanp rahe hain
Leave a Reply