Obaidur Rahman
to ab halat men apni yuun bhi tabdili nahin hoti
ye miTTi ḳhuun bhi pi kar kabhi giili nahin hoti
hua jaata hai qudrat ke usulon men daḳhil insan
hava ab to december men bhi barfili nahin hoti
chalo ankhon se ab ke baat kar ke dekhte hain ham
zaban se baat to hoti hai tafsili nahin hoti
vo jo mahsus karti hai bayan karti hai ab khul kar
ghazal pahle zamane jaisi sharmili nahin hoti
hamen hai shauq aisa Thokaron ko azmane ka
ki us rah par nahin chalte jo pathrili nahin hoti
sambhal kar ai ‘obaid’-e-ḳhush-guman rahna Thahar kar yaan
bila maqsad miyan rassi kabhi Dhili nahin hoti
Leave a Reply