didani hai hamari zeba.i
ham ki hain husn ke tamanna.i
bas ye hai intiha ta.alluq ki
zikr par un ke aankh bhar aa.i
tu na kar apni mahfilon ko udaas
raas hai ham ko ranj-e-tanha.i
ham to kah den ‘salim’ haal tira
kab vahan hai kisi ki shunva.i
aur to kya diya baharon ne
bas yahi chaar din ki rusva.i
ham ko kya kaam rang-e-mahfil se
ham to hain duur ke tamasha.i
vo junun ko baḌha.e ja.enge
un ki shohrat hai meri rusva.i
mo’taqid hain hamari vahshat ke
shahr men jis qadar hain sauda.i
ishq sahib ne dil pe dastak di
aa.i.e murshidi o maula.i
ye zamane ka jabr hai ki ‘salim’
ho ke mere bane hain sauda.i
Leave a Reply