Azeem Murtaza
laa.i na saba bu-e-chaman ab ke baras bhi
kuchh soch ke ḳhamosh hain yaran-e-qafas bhi
dastur-e-mohabbat hi nahin jaan se guzarna
kar lete hain ye kaam kabhi ahl-e-havas bhi
nazuk hain marahil safar-e-manzil-e-gham ke
is raah men kho jaati hai avaz-e-jaras bhi
azad bhi ho ja.enge aḳhir tire qaidi
ik roz bikhar ja.egi zanjir-e-nafas bhi
angusht-numa shaiḳh-o-barahman ke chalan par
masjid ke manare bhi hain mandir ke kalas bhi
divana abhi tak hai usi dushman-e-jan ka
aata hai dil-e-zar pe ghussa bhi taras bhi
kuchh aap ka gham kuchh gham-e-jan kuchh gham-e-duniya
daman men mire phuul bhi hain ḳhaar bhi ḳhas bhi
chup rah ke bhi mumkin na raha dard chhupana
ik sho.ala-e-avaz hai ab mauj-e-nafas bhi
Leave a Reply