Dhalte hue suraj ki ziya dekh rahe hain
sadiyon se bhi anjam-e-vafa dekh rahe hain
badli hui gulshan ki hava dekh rahe hain
phulon men bhi kanTon ki ada dekh rahe hain
rahon men bhaTak jaate hain kis tarah musafir
manzil pe khaḌe rah-numa dekh rahe hain
tariḳh ke chehre se na.e daur ke hathon
miTti hui tahrir-e-vafa dekh rahe hain
lagta hai ki basti men koi baat hui hai
har shaḳhs ko masruf-e-dua dekh rahe hain
achchha hai baras jaa.e agar dil ki zaban par
ham dosh pe zulfon ki ghaTa dekh rahe hain
galiyon men madine ki abhi dekhne vaale
sarkar ke naqsh-e-kaf-e-pa dekh rahe hain
ehsas ke TuuTe hue a.ine men ‘ḳhusrav’
jalti hui ham apni chita dekh rahe hain
Leave a Reply