Syeda Nafis Bano Shama
khvabon ki haqiqat bhi bata kyuun nahin dete
vo ret ka ghar hai to gira kyuun nahin dete
ab arz-o-sama men to thikana nahin mera
tum gard ke manind uda kyuun nahin dete
aalam men liye phirte ho tum apni tajalli
ham jaise charaghon ko ziya kyuun nahin dete
ijad kiya karte ho tum gham ke khilaune
tum dil bhi koi aur naya kyuun nahin dete
tum dhundte phirte ho masihai ka marham
zakhmon ko saliqe se saja kyuun nahin dete
rone ka sabab puchh na le mujh se zamana
aansu miri ankhon ke chhupa kyuun nahin dete
ye shama’ khatakti hai agar khaar ki surat
nazron se ise apni gira kyuun nahin dete
Leave a Reply